کراچی کے علاقے شاہ فیصل کالونی میں مبینہ سلنڈر دھماکے کے نتیجے میں ایک بچی سمیت چار افراد زخمی ہوگئے۔
دھماکے کے بعد امدادی ٹیمیں فوری طور پر موقع پر پہنچ گئیں اور زخمیوں کو طبی امداد کے لیے قریبی اسپتال منتقل کردیا گیا، جہاں انہیں علاج فراہم کیا جا رہا ہے۔
پولیس کے مطابق دھماکا ایک پکوان سینٹر کے اندر ہوا۔ ایس ایس پی ملیر زبیر نذیر کا کہنا ہے کہ عینی شاہدین کی جانب سے متضاد بیانات سامنے آرہے ہیں، کچھ افراد گیس سلنڈر جب کہ بعض بیٹری پھٹنے کو دھماکے کی وجہ قرار دے رہے ہیں۔
پولیس نے واقعے کی تحقیقات شروع کردی ہیں جب کہ جائے وقوعہ پر امدادی سرگرمیاں جاری ہیں۔