کراچی میں ڈیری فارمرز نے دودھ کی قیمت میں اضافے کا مطالبہ کرتے ہوئے فی لیٹر قیمت 320 روپے مقرر کرنے کی درخواست کر دی ہے۔ اس سلسلے میں ڈیری فارمرز ایسوسی ایشن نے کمشنر کراچی کو باقاعدہ خط لکھ دیا ہے۔
ڈیری فارمرز ایسوسی ایشن کی جانب سے بھیجے گئے خط میں مؤقف اختیار کیا گیا ہے کہ موجودہ قیمت پر دودھ فروخت کرنے سے فارمرز کو شدید مالی نقصان ہو رہا ہے۔ ایسوسی ایشن کے مطابق فی لیٹر دودھ پر تقریباً 70 روپے تک کا نقصان برداشت کرنا پڑ رہا ہے جو اب ڈیری فارمرز کے لیے ناقابل برداشت ہو چکا ہے۔
ایسوسی ایشن نے مؤقف اپنایا ہے کہ جانوروں کے چارے، ٹرانسپورٹ اور دیگر اخراجات میں مسلسل اضافہ ہو رہا ہے جس کی وجہ سے دودھ کی موجودہ قیمت پر کاروبار چلانا مشکل ہو گیا ہے۔ اسی لیے حکومت سے مطالبہ کیا گیا ہے کہ کراچی میں دودھ کی قیمت بڑھا کر 320 روپے فی لیٹر مقرر کی جائے۔
دوسری جانب ملک میں پیٹرولیم مصنوعات کی قیمتوں میں نمایاں اضافے کے بعد ٹرانسپورٹرز اور پاکستان ریلوے نے بھی اپنے کرایوں میں فوری اضافہ کر دیا ہے جس کے اثرات مختلف شعبوں پر پڑنا شروع ہو گئے ہیں۔
حکومت کی جانب سے پیٹرول اور ڈیزل کی قیمتوں میں فی لیٹر 55، 55 روپے اضافہ کیا گیا ہے۔ اس اضافے کے بعد ملک میں پیٹرول کی نئی قیمت 321 روپے 17 پیسے فی لیٹر جبکہ ڈیزل کی قیمت 335 روپے 86 پیسے فی لیٹر ہو گئی ہے۔
حکومتی حکام کا کہنا ہے کہ ایران، اسرائیل اور امریکا کے درمیان جاری کشیدگی اور جنگ کے باعث عالمی منڈی میں تیل کی قیمتوں میں تیزی سے اضافہ ہوا ہے، جس کے باعث مقامی سطح پر بھی پیٹرولیم مصنوعات کی قیمتیں بڑھانا پڑیں تاکہ ملک میں ایندھن کی فراہمی بلا تعطل جاری رکھی جا سکے۔
معاشی ماہرین کا کہنا ہے کہ پیٹرولیم مصنوعات کی قیمتوں میں اضافے کے بعد ٹرانسپورٹ، اشیائے خورونوش اور دیگر ضروری اشیا کی قیمتوں میں بھی اضافہ ہونے کا امکان ہے، جس کے باعث ملک میں مہنگائی میں مزید اضافہ ہونے کا خدشہ ظاہر کیا جا رہا ہے۔