فلم ’دھرندھر 2‘ کے بارے میں شائقین میں کافی تجسس پایا جاتا ہے۔ حال ہی میں یہ خبریں سامنے آئی ہیں کہ اداکار وکی کوشل ممکن ہے اس فلم کا حصہ ہوں، تاہم اس بارے میں ابھی تک کوئی سرکاری اعلان نہیں کیا گیا۔
مڈ ڈے کی رپورٹ کے مطابق ذرائع کا کہنا ہے کہ فلم میں اکشے کھنہ فلیش بیک مناظر میں نظر آئیں گے۔ اس کے علاوہ کہا جا رہا ہے کہ وکی کوشل فلم میں اپنے مشہور کردار میجر وہان شیرگل کے روپ میں دکھائی دے سکتے ہیں، جو انہوں نے فلم ’اُری: دی سرجیکل /اسٹرائیک‘ میں نبھایا تھا۔ یہ کردار فلم کی کہانی کا حصہ ہوگا اور اس میں ایکشن مناظر بھی شامل ہوں گے۔
ایک ذریعے کے مطابق، ہدایت کار ادیتیا دھر اس فلم میں بڑی اسٹار پاور شامل کرنا چاہتے ہیں، لیکن وہ اس بارے میں زیادہ بات نہیں کر رہے۔ وکی کوشل کا کردار فلم کی کہانی میں اس طرح شامل کیا گیا ہے کہ مستقبل میں اس پر الگ فلم بھی بن سکتی ہے۔
دلچسپ بات یہ ہے کہ وکی کوشل نے اپنے مناظر کی شوٹنگ پچھلے سال ہی مکمل کر لی تھی، وہ بھی اس وقت جب ’دھرندھر‘ کی پہلی فلم ریلیز بھی نہیں ہوئی تھی۔ وکی کوشل ادیتیا دھر کے پسندیدہ اداکاروں میں سے ایک ہیں۔
اگرچہ ابھی تک یہ واضح نہیں کہ وکی کوشل اور رنویر سنگھ کے کردار ایک دوسرے سے ملیں گے یا نہیں، لیکن شائقین اس ممکنہ ملاپ کو لے کر کافی پُرجوش ہیں۔
‘دھرندھر‘ 5 دسمبر 2025 کوبھارتی سینما گھروں میں ریلیز ہوئی تھی، جس میں رنویر سنگھ نے بھارتی ایجنٹ کا کردار ادا کیا تھا۔ فلم نے بھارت اور بیرونِ ملک شاندار کامیابی حاصل کی اور باکس آفس پر بڑا بزنس کیا۔