خیبرپختونخوا کے ضلع چترال میں مکان پر تودہ گرنے سے ایک ہی خاندان کے 9 افراد جاں بحق ہوگئے جب کہ ایک بچی معجزانہ طور پربچ گئی ہے۔
چترال کے دور افتادہ علاقے سریگال دمیل ارندو میں باچا نامی شخص کے مکان پر شدید برفباری کے باعث تودہ گرا جس کے نتیجے میں 10 افراد ملبے تلے دب گئے۔
حادثے کے فوراً بعد مقامی افراد نے امدادی کاروائیوں میں حصہ لیتے ہوئے ملبے سے 9 لاشوں کو نکال لیا جب کہ ایک بچی بھی زندہ نکال لی گئی۔
دوسری جانب صدرِ مملکت آصف علی زرداری نے چترال میں برفانی تودہ گرنے سے قیمتی جانوں کے ضیاع پر دکھ کا اظہار کیا اور جاں بحق افراد کے لواحقین سے دلی تعزیت کی ہے۔
صدر نے کہا کہ اللّہ تعالیٰ مرحومین کو جوارِ رحمت میں جگہ عطا فرمائے، شدید بارش اور برف باری موسمیاتی ہنگامی صورت حال کی واضح نشانیاں ہیں، موسمی تبدیلیوں کے مطابق نقصانات کم کرنا وقت کی اہم ضرورت ہے۔
آصف زرداری نے وفاقی اور صوبائی کو متاثرہ علاقوں میں امدادی اقدامات تیز کرنے کی ہدایت کرتے ہوئے کہا کہ عوام کے تحفظ کو یقینی بنایا جائے۔