امریکا میں کمرشل ڈرائیور لائسنس کے ٹیسٹ کے لیے بڑی شرط عائد – World

امریکا میں ٹرک اور بس ڈرائیورز کے لیے کمرشل ڈرائیونگ لائسنس ٹیسٹ انگریزی زبان میں لیے جائیں گے۔

ایسوسی ایٹڈ پریس کی رپورٹ کے مطابق امریکی صدر ڈونلڈ ٹرمپ کی انتظامیہ نے ٹرانسپورٹیشن انڈسٹری میں حفاظتی اقدامات سخت کرنے اور نااہل ڈرائیورز کو سڑکوں سے ہٹانے کی مہم کو مزید وسعت دے دی ہے۔

امریکی وزیر ٹرانسپورٹ شان ڈفی نے جمعہ کو اس نئے اقدام کا اعلان کرتے ہوئے کہا کہ ڈرائیورز کے لیے وفاقی تقاضوں کے مطابق انگریزی زبان سمجھنا لازمی ہوگا تاکہ وہ سڑکوں پر لگے اشارے پڑھ سکیں اور قانون نافذ کرنے والے اداروں سے مؤثر انداز میں رابطہ کر سکیں۔ انہوں نے بتایا کہ فلوریڈا میں پہلے ہی ڈرائیونگ لائسنس کے ٹیسٹ انگریزی میں لینا شروع کیے جا چکے ہیں۔

اس وقت کئی ریاستیں ڈرائیورز کو دیگر زبانوں میں بھی امتحان دینے کی اجازت دیتی ہیں، حالانکہ ان کے لیے انگریزی مہارت کا مظاہرہ کرنا ضروری قرار دیا گیا ہے۔

امریکی ریاست کیلیفورنیا 20 مختلف زبانوں میں ٹیسٹ کی سہولت فراہم کرتی رہی ہے۔ ڈفی کے مطابق بعض ریاستوں نے کمرشل لائسنس کے امتحانات لینے کے لیے نجی کمپنیوں کی خدمات حاصل کر رکھی ہیں، لیکن یہ کمپنیاں ڈرائیورز کی ڈرائیونگ اور انگریزی مہارت کے معیار کو مؤثر طریقے سے نافذ نہیں کر رہیں۔

امریکی وزیر ٹرانسپورٹ شان ڈفی کا مزید کہنا تھا کہ ہر امریکی شہری یہ توقع رکھتا ہے کہ 80 ہزار پاؤنڈ وزنی ٹرک چلانے والے ڈرائیور مکمل تربیت یافتہ اور اہل ہوں۔ ان کے بقول طویل عرصے تک ٹرکنگ انڈسٹری کے مسائل کو نظرانداز کیا گیا جس کے نتیجے میں شہریوں کی جانوں کو خطرات لاحق ہوئے۔

یہ تازہ اقدامات ایسے وقت میں سامنے آئے ہیں جب ٹرانسپورٹیشن ڈیپارٹمنٹ نے چند روز قبل حفاظتی معیار پر پورا نہ اترنے کے باعث 557 ڈرائیونگ اسکولز بند کرنے کا اعلان کیا تھا۔

محکمہ ٹرانسپورٹ گزشتہ برس اگست میں پیش آنے والے ایک مہلک حادثے کے بعد سے ان ریاستوں کے خلاف سخت کارروائیاں کر رہا ہے جنہوں نے ایسے تارکینِ وطن کو کمرشل لائسنس جاری کیے جو اس کے اہل نہیں تھے۔

ڈفی کے مطابق ایک ٹرک ڈرائیور جو امریکا میں قیام کا مجاز نہیں تھا، اس نے غیر قانونی یو ٹرن لیا اور ایک حادثے کا سبب بنا جس میں تین افراد ہلاک ہوگئے تھے۔ اس کے بعد بھی مزید حادثات رونما ہوئے تھے جس میں متعدد افراد جان سے ہاتھ دھو بیٹھے تھے۔